Х.Эрдэнэт-Од гавьяат зодог тайллаа

Монгол улсын гавьяат тамирчин Хишигбатын Эрдэнэт-Одын зодог тайлах ёслол “Бөхийн өргөө”-нд боллоо. Жүдо, самбо бөхийн спортоор 20 жил хичээллэж, 20 жилийн амьдрал, нөр их хөдөлмөр, авьяас билгээ спортын ертөнцөд зориулж явсан их спортын ирмэг бүсгүйн байгуулсан ялалт, ялагдлууд Монголын спортын түүхэнд алтан үсгээр бичигдэн үлдэв. Тэрбээр их спортын дэвжээнээ мэхийн ёсолж, хүндэтгэл үзүүлсэнийхээ дараа өөрийн гарын шавь Цэрэнхандын Хандсүрэнд кимоно, бүс гардуулан өгсөн юм. Их спортын дэвжээгээ нулимс үдсэн Х.Эрдэнэт-Од гавьяатыг МҮОХ “Алтан очир” одонгоор шагнаж урамшууллаа. Монголын жүдо бөхийн холбооны гишүүд, спортын анд нөхөд нь түүнд алд цэнхэр хадаг, мөнгөн аягатай сүү барин догдолсон сэтгэлийг нь хуваалцав. Зодог тайлах ёслолын үеэр гавьяат тамирчин х.Эрдэнэт-Одтой уулзаж, сэтгэгдлийг нь сонслоо.

Х.Эрдэнэт-Од: Миний зодог тайлах цаг болсон

-Зодог тайлах энэ мөчид таньд яг юу бодогдож байна вэ?

-Надад хүндлэл үзүүлж ирсэн олон түмэндээ баярлалаа. Өнөөдөр миний амьдралд нэгэн дурсгалтай үйл явдал болж байна. Жүдо бөх гэж энэ сайхан спортоор 20 хичээллэлээ. Аливаа зүйлд цаг хугацаа гэж байдаг. Миний зодог тайлах хугацаа болжээ. Спортоор хичээллэх хугацаандаа өөрийн зүгээс хийж чадах бүх зүйлээ хийлээ. Хорин жилийн турш намайг дэмжин ажиллаж, ялалт ялагдлыг минь хамт хуваалцаж байсан багш дасгалжуулагч, ивээн тэтгэгч, спорт сонирхогчиддоо баярлалаа. Намайг спортын дэвжээнд амжилт гаргахад их нөлөө үзүүлсэн Ч.Машбат багшийнхаа гэгээн дурсгалыг хүндэтгэж байна.

-Та цаашдаа дасгалжуулагч багшаар ажиллах уу?

-Хэд хэдэн гарын шавьтай болсон. Тэдэнтэйгээ ажиллана. Би спортын дэвжээнд энэ цагаан хувцастай дахин гарахгүй ч шавь нартайгаа сургуулилт хийхдээ хувцасаа өмсч байх болно шүү дээ.